ԸԲ Մասին

Սխալ կարծիք. Ընտանեկան բռնության զոհերը հաճույք են ստանում բռնության ենթարկվելուց:

Փաստ. Այս տեսությունը չի համապատասխանում իրականությանը: Ընտանեկան բռնության զոհերը հուսահատորեն ձգտում են վերջ տալ բռնություններին. նրանք կիրառում են գոյատևման տարբեր ռազմավարություններ՝ այդ թվում ահազանգում են ոստիկանություն կամ օգնություն են խնդրում ընտանիքի անդամներից իրենց և երեխաներին պաշտպանելու համար: Որոշ դեպքերում լռությունը կարող է գոյատևման ռազմավարություն լինել:

Սխալ կարծիք. Ընտանեկան բռնության զոհերը հոգեկան խանգարումներ ունեն: Փաստ. Վերը նշված միֆը հիմնված է այն գաղափարով, որ եթե կինը հոգեպես առողջ լիներ, ապա չէր հանդուրժի բռնությունը: Սակայն վերջին հետազոտությունները ցույց են տալիս, որ բռնության զոհերը տարբեր ձևերով փորձում են խուսափել բռնությունից: Բացի այդ, ընտանեկան բռնության զոհերի մեծ մասը հոգեկան խանգարում չունի, սակայն դա չի նշանակում, որ բռնությունը երբեք չի կիրառվում հոգեկան խնդիր ունեցող կանանց նկատմամբ: Որոշ զոհեր կարող են տառապել իրենց հոգեկանի վրա բռնության թողած ազդեցությունից, օրինակ՝ հետտրավմատիկ սթրեսից կամ դեպրեսիայից:

Սխալ կարծիք. Երբ ծնողներից մեկը մյուսի հանդեպ բռնություն է կիրառում, երեխաները չեն տուժում դրանից: Փաստ. Ուսումնասիրությունները ցույց են տալիս, որ ծնողների միջև բռնության պարագայում երեխաների 50-70%-ի նկատմամբ նույնպես բռնություն է կիրառվում: Տանը բռնությանը ականտես լինելու պատճառով երեխաները ունենում են կոգնիտիվ, վարքային ու զարգացման խանգարումներ: Բացի այդ, որոշ երեխաներ (մանավանդ տղաները) մեծանալով կրկնօրինակում են իրենց տեսած բռնարար վարքը:

Սխալ կարծիք. Ցածր ինքնագնահատականը դրդում է մարդկանց ներգրավվել բռնարար հարաբերություններում։

Փաստ. Ավանդաբար՝ տեսությունները փորձում էին ներկայացնել, թե բավարար ինքնագնահատական ունեցող անձինք թույլ չեն տա իրենց նկատմամբ բռնարարք իրենց ամուսնու կամ զուգընկերոջ կողմից։ Փաստացի, ուսումնասիրությունները ցույց են տվել, որ ընտանեկան բռնություն վերապրածների միջև բացի կին լինելուց՝ այլ ընդհանրություններ քիչ կան։ Այդուհանդերձ որոշ վերապրածների մոտ նկատվում է ինքնագնահատականի անկում, քանի որ բռնարարները ստորացնում, նվաստացնում և քննադատում են նրանց։

Սխալ կարծիք. Բռնարարներն իրենց կողակցին կամ ամուսնուն բռնության են ենթարկում ալկոհոլի կամ թմրադեղերի ազդեցության տակ։

Փաստ. Ալկոհոլի կամ թմրադեղերի չարաշահումը չի հանդիսանում ընտանեկան բռնության դրդապատճառ, չնայած այն հաճախ է օգտագործվում որպես արդարացում։ Որոշ դեպքերում ալկոհոլի կամ թմրադեղերի չարաշահումը կարող է մեծացնել բռնության դեպքերի հաճախականությունը և հանգեցնել որոշ դրվագներում բռնության ուժգնացման, սակայն ընտանեկան բռնությունը պայմանավորված է կողակցի նկատմամբ ուժ և վերահսկողություն կիրառելու ցանկությամբ։